Monday, 12 July 2010

واجب متأخر :)



عادتي.. من أيام المدرسة كسوله ودائماً متأخره بحل الواجبات :P..
وبما اني الأخيره فماضل حد أسويله تاق.. بس مش مشكلة متأخر أحسن من مفيش- هههههههه
المهم.. أنا حمدلله وصلت عمان امبارح فقلت خليني أزوق عحالي وأسوي واجبي :)
الأسرار الستة.. هوه في ست أسرار أنا اكتشفتهم عن حالي بهاي السفره وحبيت اشاركم فيهم؛

١. باخد ٥ أيام -على الأقل- لأتعود عالمكان الجديد إلي أنا مسافره عليه..
٢. أكتر شي بحب اشتريه من فئة الأواني المنزليه هو فناجين النسكافيه والشاي.. فعلياً بالبيت عنا مجموعه كبيره.. ماما بتضل تقول لازم يسمو هاي الدار -دار المجات-.. وأنا عند أختي ما عجبوني فناجينها النسكافيه أو هيه حجه كانت عشان أشتري واحد جديد..
٣. أبداً ما بحب الألعاب الإلكترونيه
"Video Games"
.. بدبي المسافات بعيده والطرق طويله.. وولاد أختي ما شاء الله عليهم دائماً عاملين استعداداتهم.. على طول البي إس بي والجيم بوي معهم عشان يتسلو لبيل مانوصل.. أنا ما إلي مراء على هيك شي.. أبداً.. بزهق من تاني دقيقه..
٤. مابقدر أعيش من دون الميوزك تعتي.. قبل ما اسافر بيوم شريت فلاش ميموري ٤ جيجا فللتها ومع هيك كنت دائماً اشتاق لكمبيوتري وكولكشن الأغاني تعتي إلي عليه..
٥. حكيتلكم بإدراج سابق اني أصغر وحده بالعيله.. فا إلي اكتشفتو بحالي إنو ماعندي لغة جدال مع الصغار.. بس أعصب وبدي أجادلهم بسكت عشان الحكي إلي بكون ححكيه كبير فكنت أخلي أختي تتولى هاي الشغله..
٦. لما أكون مسافره بكون كتير كتير أنشط من ما بكون عادةً .. ما عندي مشكله لو نمت على ٢ وصحيت تاني يوم ٨ ..