Tuesday, 11 May 2010

!ذكريات

اليوم روحت من الشغل كتير تعبانه.. أصلو هادا الأسبوع عم أضل أنام متأخر وأصحى بكير.. وما بكون بعمل إشي مفيد.. لا بس هيك قاعده..

فكرت أنام.. بس أنا إذا نمت راح أسحبها للصبح -عادي ماعندي أي مشكله- قلت أحسن إشي أخد قيلوله عالكنباي.. فعلاً زبطت معي ونمت بس ساعتين -لو نمت على تختي كان أقل اشي ٣ ساعات- صحيت على ٨ وقلت خليني استفيد من باقي اليوم.. رحت على السيفوي أجيب كام من غرض ناقصيني..

أول ما طلعت من البيت وشفت الجو.. يا الله إتزكرت قبل ٤ سنين لما سافرت عند أختي على كندا بصيف ال ٢٠٠٦.. كانت طيارتي على ال ٤ الفجر.. وأخوي موديني عالمطار إتزكرت إنو ما أخدت نسكافيه معاي..أختي قالتلي إنو مافي عندهم نسكافيه ٣ إن ١.. فقبل المطار رحنا على السيفوي نجيب النسكافيه.. كان الجو نفس جو اليوم.. هوى بارد مخلوط بريحة الشجر الندي.. والسماء اضاءتها غير مو زي كل ليله..

في يوم قبل ٤ سنين أنا كنت بهادا المكان.. وكانت هاي الأغنيه أجدد اشي وقتها..

15 comments:

  1. بتمشي الأيام بسرعة :(

    ReplyDelete
  2. ان شاء الله بتزوريها و بتجددي الذكريات الحلوه :)

    ReplyDelete
  3. hamdanism ;
    ..الأيام مش عم تمشي.. الأيام عم بطير

    Whisper ;
    الكل كان مش عاجبو جو إمبارح إلا أنا.. زكرني بهديك الأيام.. إن شاء الله بتيجي على عمان بالصيف :)

    ReplyDelete
  4. صباح الخير رولا
    ما في إشي بضاهي سحر الفجر، كنت قبل ما أدخل الثلاتين أطلع أركض الفجر من بيتنا للمدينة الرياضية، ولما كنت أدخل المدينة المليانة بشجر السرو( العزيز على قلبي) اللي بكون برسل أوكسجين بارد بالفجر، كنت أشعر بشعور خيالي، كنت اتذكر لما ربنا لما أقسم بالفجر، الفجر مرتبط بذكريات السفر والطفولة، الفجر حالة غريبة، ومن الأمور اللي بتاخدني لدنيا تانية (شارع المطار) اللي الو سحر خاص
    ان شاء الله بلتم شملكم في الصيف
    حاولت اني اكون الو المعلقين
    بس ما زبطت معي

    ReplyDelete
  5. ان شاء الله ربنا بيجمعكم على خير , الي اخت بكندا , شفتها 3 مرات خلال اخر 14 سنة تقريبا

    الله يخليلك اياها ويجمعكم على خير يا رب

    ReplyDelete
  6. مرحبا رولا

    الطبيعة بأجوائها المختلفة تشكل نقاطا تتقاطع فيها العديد من الذكريات المؤلمة أو السعيدة

    أتمنى أن تحمل بشائر الطبيعة التي عشتها بالامس لقاء قريبا بشقيقتك

    وربنا يخليكم لبعض دائما

    نهارك سعيد

    ReplyDelete
  7. نادر احمد ;
    صباح الورد،، احنا كمان كنا هيك.. بس احنا كنا نمشي.. ٦ إلا شوي كنا نكون بلشنا مشي..
    معاك حق.. جد وقت الفجر حلو كتير.. ومرتبط بذكريات السفر والطفوله.. بتذكر دايماً وإحنا مسافرين جايين من الرياض لعمان كنا نوصل وقت الفجر ونصحي خالتي من النوم عشان تيجي تاخدنا من العبدلي..
    شارع المطار معناتو عندي الروحه لإستقبال الأحبة.. خواتي.. بنات عمي..
    هههههههه ماتقلق وجودك بالمدونه وتعليقك على كل جديد بكفي وبوفي..

    ReplyDelete
  8. LUNAR. ;
    يا الله والله كتير.. ملعون أبوها الغربه إلي بتفرق الحبايب..

    ReplyDelete
  9. أشرف محيي الدين ;
    شكراً كتير.. كلامك حلو وبصبر على بعد الحبايب.. الله يجبر بخاطرك..
    نهارك أسعد.. شكراً..

    ReplyDelete
  10. مرحبا رولا
    يمكن اليوم هاي اول مرة بكتب تعليق في مدونتك مع انك متابعة دائمة للكيل بمكيالين واحيانا اول وحدة بتكتب تعليق، فشكرا الك، واعذريني اصلي كسولة شوي واحيانا لايام ما بشغل الكمبيوتر.
    حالة التعب اللي عندك عندي زيها ما بعرف انام بدري ولازم اصحى من 6:30 عشان اجهز للشغل، يكن لازم نحسم الموضوع وناخد اجازة ونرتاح عالمزبوط
    ذكرتيني بايام السفر لما كنا نسافر واحنا صغار بالسيارة ونظل يومين ثلاث عالطريق، تجرب حلوة وما بتنتسى، بتعرفي من زمان ما سافرت، شجعتيني افكر بسفرة هالصيفية
    سلام

    ReplyDelete
  11. أهلا وسهلا نورتي المدونه،،
    عفواً وشكراً إلك على إدراجاتك الحلوه وإلي ديماً بتفش القلب،، والله ماما الله يعينها يمكن بتصحيني ٤ ٥ مرات لأقوم وأبلش أتجهز..
    أنا عكسك عالأخر.. كتير بحب اني أشيك على مواقع وأقرأ مدونات الغير..
    ذكريات الطفوله ولا أحلا..
    يالله إذا صحلك روحه عالعقبه لحقي حالك قبل الزحمه :)
    شكراً على الزياره الحلوه كتير انبسطت فيها..

    ReplyDelete
  12. انا كمان بحن للذكريات ... خصوصي الطفولية منها
    دايما بتذكر قصص تحشيش صارت معي وبحكيها لآهلي
    متل مرة بالشام كان رايحين ع مهرجان ميرامار

    المهم انا واختي كنا نحب نمشي ع السور بالشارع ... متل البهلوان ... نتوازن وبكون مافي مكان تحطي غير رجل وحدة
    بظن تخيلتي الوضع
    المهم واحنا ماشيين هيك اختي وقعت
    ووقعت امي معها
    وانا قاعد اضحك عليهم
    الحمدلله ماصار اشي ... والسور ما كان عالي


    يللا نعيش ونتذكر

    ReplyDelete
  13. ههههههههه ذكرتني مره وإحنا صغار كنا أنا وأخوي بنشوف فيلم هندي.. وحبينا نقلد الممثلين.. بدينا قتال بعدين اجت ضربه مني على أصبعو الصغير وكسرتيلو إياه.. صار بدو يحكي لأبوي -الله يرحموا- قلتلو لأ انتا فوت نام وبكره لما تصحى حيكون طاب.. والله فعلاً دخل ينام.. بس صحي بنص الليل ايدو نافخه وأخدو عالمستشفى.. هههههه مش يوم صراحه.. ومن يومها بطلنا فرجه على أفلام هندي..

    ReplyDelete
  14. الله يرحمه ان شالله ... بس كيف اقتنع اخوكي منك ونام؟
    انا لو شو ما صار بروح بحكي

    ReplyDelete
  15. تعيش..
    كنا صغار أيامها.. هوه احنا اتنين كنا خايفين من إنا نسمع بهدله.. فحاولنا نختصر وإنلملم الموضوع.. بس أبداً ورمت ايدو بالليل هههههههه ذكريات..

    ReplyDelete